పదునాల్గవ పద్యము: శ్రీ కేశవ కంద గీత గర్భ చంపకోత్పల శతకము [గర్భకవిత్వము]

 ఓం నమో భగవతే వాసుదేవాయ

శ్రీ కేశవ కంద గీత గర్భ చంపకోత్పల శతకము

[గర్భకవిత్వము]

పదునాల్గవ పద్యము:

చంపకమాల:
అల త్రిపురాసురుల్ చెలఁగ, నా రిపుభార్యల శీలజాల శ్రీ
లిలఁ దనరన్, బ్రభూ! యపహరింపఁగ, బుద్ధుఁడవయ్యు, నీవు,  భా
మలఁ దపులన్, రతిం గొని, యుమాధిపు నప్పురిఁ గూల్పఁజేతె, తే
జిలఁగ హరీ! నతుల్ పురుష సింహ! పురాణపు బుద్ధ! కేశవా! 14

గర్భిత కందము:
త్రిపురాసురుల్ చెలఁగ, నా
రిపుభార్యల శీలజాల శ్రీ లిలఁ దనరన్,
దపులన్, రతిం గొని, యుమా
ధిపు నప్పురిఁ గూల్పఁజేతె, తేజిలఁగ హరీ! 14

గర్భిత తేటగీతి:
ప్రబల, నా రిపుభార్యల శీలజాల
మపహరింపఁగ, బుద్ధుఁడవయ్యు, నీవు
గొని, యుమాధిపు నప్పురిఁ గూల్పఁజేతె!
పురుష సింహ! పురాణపు బుద్ధ! కేశ! 14

స్వస్తి

’మధురకవి’ గుండు మధుసూదన్, శేషాద్రిహిల్స్, ఓరుగల్లు